Posibilidade de que o persoal eventual poida pasar á situación administrativa de excedencia voluntaria por coidado de fillo.

A consulta versa sobre a posibilidade de que o persoal eventual poida pasar á situación administrativa de excedencia voluntaria por coidado de fillo.

As situacións administrativas reguladas no Título VIN do texto refundido da Lei do Estatuto Básico do Empregado Público, aprobado polo Real Decreto Lexislativo 5/2015, do 30 de outubro (en diante, TRLEBEP), están previstas, de acordo con o artigo 85 do mesmo, para os “funcionarios de carreira”.

No entanto, hai que ter en conta o disposto no artigo 12, apartado 5 do TRLEBEP cando sinala que “ao persoal eventual seralle aplicable, no que sexa adecuado á natureza da súa condición, o réxime xeral dos funcionarios de carreira”.

Neste sentido, a Directiva (UE) 2019/1158 do Parlamento Europeo e do Consello, do 20 de xuño de 2019, relativa á conciliación da vida familiar e a vida profesional dos proxenitores e os coidadores, cuxo obxectivo é lograr a igualdade entre homes e mulleres polo que respecta ás oportunidades no mercado laboral e ao trato no traballo, facilitando aos traballadores que sexan proxenitores ou coidadores a conciliación da vida familiar e profesional, establece un dereito individual dun permiso parental aos traballadores que sexan proxenitores por motivo de nacemento ou adopción polo período definido polos Estados membros.

O ámbito de aplicación desta Directiva esténdese a “todos os traballadores, homes e mulleres, que teñan un contrato ou unha relación laboral tal que definida na lexislación, os convenios colectivos ou os usos vixentes en cada Estado membro, tendo en conta a xurisprudencia do Tribunal de Xustiza”.

Polo que esta norma de dereito derivado, que forma parte do acervo comunitario e por tanto é de obrigado cumprimento para os Estados membros, non distingue entre os diferentes contratos laborais existentes na lexislación laboral de cada Estado.

Cabe concluír, por tanto, que a situación de excedencia por coidado de fillo resulta de aplicación ao persoal eventual de conformidade co establecido na Directiva (UE) 2019/1158 do Parlamento Europeo e do Consello.

No entanto, a aplicación desta normativa non debe facernos esquecer a natureza da relación laboral do persoal eventual e os dereitos que comporta, de maneira que se manterán as condicións inherentes á natureza deste persoal, incluídas as causas de cesamento deste, contidas no artigo 12 do TRLEBEP e que poderán producirse durante a situación de excedencia voluntaria por coidado de fillo.

Todo o anterior indícase sen prexuízo de lembrar que, de acordo con o réxime de competencias deste centro directivo, as respostas a consultas que emite esta dirección xeral posúen carácter meramente informativo e, en consecuencia, non teñen carácter de criterio vinculante, nin orixinan dereitos nin expectativas de dereito, nin implican vinculación algunha co tipo de procedementos a que se refiran. Ademais, ao carecer de carácter preceptivo ou vinculante, os órganos destinatarios das estas respostas poderán, no seu caso, adoptar finalmente unha decisión que non se corresponda co parecer contido nas mesmas.

As respostas a consultas contidas neste boletín atenden ás cuestións expostas á luz da normativa vixente no momento da súa emisión, de maneira que estas respostas poden verse afectadas por modificacións lexislativas posteriores ou resolucións xudiciais.