As Administracións Públicas españolas deben estar á altura das expectativas cidadás propias da sociedade actual. Por esta razón a calidade debe orientar a xestión e a prestación dos servizos públicos, o que implica unha mellora continua dos mesmos e, sobre todo, un diálogo permanente entre expectativas e prestacións. Este obxectivo complexo ha de ser abordado con instrumentos que faciliten a xestión dos servizos ao cidadán con criterios de eficiencia, evidenciando así o bo goberno do público.

Nesta contorna, as Cartas de Servizos constitúen quizais o instrumento máis xenuíno para dar resposta aos retos dos servizos públicos. O seu uso, xeneralizado desde hai anos para os tres niveis de goberno, facilita a homoxeneización dos compromisos de calidade nun Estado descentralizado pero cuxos cidadáns-usuarios son receptores unitarios dos servizos e prestacións públicas.

Precisamente para o impulso de políticas e programas de calidade, excelencia e avaliación nas Administracións Públicas españolas a través da cooperación e a colaboración, púxose en marcha en outubro de 2005 a Rede Interadministrativa de Calidade nos Servizos Públicos. Froito especialmente significativo da actividade desta Rede é a “Carta de Compromisos coa Calidade das Administracións Públicas Españolas”, aprobada por Conferencia Sectorial de Administración Pública en 2009 e que establecía, por primeira vez, uns compromisos de calidade comúns para os tres niveis da nosa Administración Pública. Non é casual que, entre eses compromisos, o oitavo fixese referencia expresa á elaboración e difusión de Cartas de Servizos dos organismos públicos.

O documento que agora presentamos trata de responder a ese empeño co excelente traballo colaborativo no que interviñeron representantes da Administración Xeral do Estado, das Comunidades Autónomas e das Entidades Locais, publicación que con seguridade permitirá utilizar unha linguaxe compartida e lograr a coordinación e coherencia dos esforzos, así como o aproveitamento de sinerxias. Os usuarios teñen dereito a coñecer as características dos servizos que reciben así como as condicións en que se prestan. Este exercicio práctico de transparencia contribuirá sen dúbida á mellora dos procesos internos nas organizacións e á estimulación dos equipos de traballo. Pero sobre todo axudará a que a cidadanía goce duns servizos públicos acordes coas súas expectativas.