Telekomunikazioen Lege Orokorraren Aurreproiektua aurkeztu du Jaurlaritzak

Gaur hasi da Telekomunikazioen Lege Orokorraren Aurreproiektuaren (APL) entzunaldi publikorako epea. Urriaren 13ra arte egin ahal izango dira ekarpenak Ekonomia Gaietako eta Transformazio Digitaleko Ministerioaren web orrian.

Etorkizuneko legeak Europako Parlamentuaren eta Kontseiluaren 2018ko abenduaren 11ko (EB) 2018/1972 Zuzentarauaren transposizioa egingo du Espainiako ordenamendu juridikora (zuzentarau horren bidez, komunikazio elektronikoen Europako Kodea ezartzen da).

Telekomunikazioen Lege Orokor berri bat izapidetzea eta onartzea da “Espainia Digitala 2025” estrategiaren konpromisoetako bat konektibitatearen eremuan, eraldaketa digitalaren giltzarria baita.

Aurreproiektuak komunikazio elektronikoen zerbitzuak arautzeaz gain, telekomunikazio-ekipoei, eraikinetako telekomunikazio-azpiegitura komunei eta jabari publiko erradioelektrikoaren erabilera guztiei buruzko alderdiak ere jasotzen ditu.

Berrikuntza gisa, lehen aldiz arautzen dira zenbakikuntzan edo mezularitzan oinarritzen ez diren pertsonen arteko komunikazio-zerbitzuak. Betebehar administratiboak ezartzen dira, hala nola Operadoreen Erregistroan inskribatzea eta segurtasun-neurriak betetzeko betebeharra, zerbitzu tradizionaletatik bereizten diren arriskuen arabera.

COVID-19aren osasun-krisiak balioan jarri ditu telekomunikazio-sareak, eta, horregatik, aurreproiektuak arreta berezia jartzen du komunikazio elektronikoetarako irispidea baldintza berdinetan eta arrazoizko baldintzetan ahalbidetzeari, zerbitzu unibertsala berrituz eta malgutuz.

Alde batetik, kabinak eta telefono-gidak kendu egiten dira. Bestetik, sarbide-abiadurek oinarrizko zerbitzu digital jakin batzuk modu funtzionalean ematea bermatzen dute, hala nola posta elektronikoa, lineako albisteak edo Internet bidezko banka. Era berean, eskuragarritasuna eta, aldi berean, erabiltzailearen aukeratzeko gaitasuna bermatzeko, zerbitzu unibertsala operadore guztiek eman ahal izateko aukera ezartzen da.

Erabiltzaileen eskubideei dagokienez, Kodean aurreikusitako harmonizazio komunitarioa egiten da, kontratuen gardentasuna indartzen delako, haien iraupena mugatzen delako eta, lehen aldiz, zerbitzu-paketeak arautzen direlako. Halaber, handitu egin ditu mugikorren eramangarritasunaren alorreko eskubideak eta desgaitasuna duten erabiltzaileen irisgarritasun-betebeharrak.

Arauak larrialdietako komunikazio-zerbitzuen gaitasunak ere indartzen ditu. Jarduteko eta informatzeko aukerak zabaltzen dira, eta, hala, autonomia-erkidegoei 112 zerbitzu eraginkorragoa emango zaie. Zehazki, erraztasun berriak sartzen dira hondamendi edo larrialdi handien kasuan biztanleentzako alerta-sistemak garatzeko, eta 112 telefono-zenbakira deitzen duten pertsonen kokapen zehatzagoa izateko.

Berrikuntza gisa, espektro irrati-elektrikoaren kudeaketari buruzko arauak berrikusiko dira, 5G sareen eta haririk gabeko beste zerbitzu berritzaile batzuen hedapena errazteko. Erreforma horietatik garrantzitsuena da espektroaren erabilera mugatzaileei lotutako lizentzietarako gutxienez 20 urteko iraupena zehaztea.

Azkenik, esan behar da lege-aurreproiektuak funtsean Espainiako lege-esparrua gordetzen duela azpiegituren hedapenari laguntzeari dagokionez; izan ere, Espainian Europako zuntz optikozko sarerik zabalenaren inbertsio pribatua eta garapena sustatu ditu, eta eredutzat hartu zen Komunikazio Elektronikoen Europako Koderako.