Arau hori 2021eko abenduaren 30ean sartuko da indarrean, eta uztailaren 6ko 14/2021 Errege Lege Dekretuan du jatorria. Testu hori uztailaren 21ean baliozkotu zen Diputatuen Kongresuan.

Legebiltzarreko izapidetze-fasean, araua alderdi politikoen arteko elkarrizketarekin aberastu da, eta sektore publikoko langileen ordezkariekin eta Administrazioko mailekin negoziatu da. Jatorrizko testua Negoziazio Mahai Orokorrean CC OO, UGT eta CSIF sindikatuekin berretsitako akordio batetik dator, bai eta Administrazio Publikoaren Konferentzia Sektorialaren barruko eztabaidatik eta Enplegu Publikoaren Batzorde Koordinatzailearen bileretatik ere, non autonomia-erkidegoek eta Udalerrien eta Probintzien Espainiako Federazioak (FEMP) parte hartzen duten.

Legearen helburua da administrazio guztien behin-behinekotasuna % 8tik behera murriztea. Konpromiso hori Gobernuak hartu zuen Europar Batasunarekin, Berreskuratze, Eraldaketa eta Erresilientzia Planean jasotako erreformen bidez, eta Europar Batasuneko Justizia Auzitegiaren eta Auzitegi Gorenaren epaiak betetzea ere badakar.

Arau horren arabera, administrazio publikoek 2022ko ekainaren 1a baino lehen eskaini beharko dituzte egun okupatuta dauden aldi baterako langileen plazak, eta hautaketa-prozesuek 2024ko abenduaren 31 baino lehen amaitu beharko dute. Lanpostu horiek oposizio-lehiaketa bidez eskuratuko dira. Lehiaketa-aldiak% 40 balioko du, eta esperientzia izango da baloraziorako elementu erabakigarria. Oposizioaldiko ariketak ez dira baztergarriak izango.

Bestalde, 2016ko urtarrilaren 1a baino lehen aldi baterako etenik gabe beteta egon diren plazak lehiaketaren bidez deituko dira, salbuespen gisa.

Araua Administrazioaren maila guztietan, merkataritza-sozietate publiko guztietan, enpresa-entitate publikoetan, fundazioetan eta sektore publikoko partzuergoetan aplikatuko da; beraz, erregularizazio-prozesua eremu horietan guztietan egingo da, araudi espezifikora egokitu ahal izatearen kalterik gabe.