Esta resolución actualiza, á luz da vixente Lei 2/2021, do 29 de marzo, de medidas urxentes de prevención, contención e coordinación para facer fronte á crise sanitaria ocasionada polo COVID 19, as medidas establecidas na última resolución ditada para ese efecto polo Secretario de Estado de Política Territorial e Función Pública, do 17 de xuño de 2020, así como as contempladas na actualización da mesma data da Instrución do 22 de abril de 2020 do Secretario Xeral de Función Pública sobre medidas e liñas de actuación en materia de prevención de riscos laborais fronte á COVID-19.
A resolución adoptada ten por obxecto servir de marco xeral para garantir a homoxeneidade na volta á presenza física ordinaria nos centros de traballo para todo o persoal ao servizo da Administración Xeral do Estado, sen prexuízo das particularidades derivadas da estrutura de cada departamento ministerial e localización territorial dos mesmos, así como da necesaria adaptación das medidas á evolución da crise sanitaria ocasionada pola COVID-19.
Así mesmo, esta resolución dítase sen prexuízo das especificidades e especialidades existentes na Administración Xeral do Estado relacionadas coa tipoloxía de persoal e os servizos públicos a prestar.
Durante o seu período de vixencia, a modalidade ordinaria de prestación na Administración Xeral do Estado para todo o seu persoal será a presencial no centro de traballo, sen prexuízo dos criterios e pautas que se establecen para os colectivos especialmente sensibles fronte á COVID-19 pola autoridade sanitaria.
As medidas derivadas da resolución serán obxecto de negociación, consulta ou información en función da materia, nas Mesas Delegadas ou no órgano de participación social correspondente.
A resolución terá plenos efectos a partir do próximo 1 de outubro de 2021.