O 1 de decembro publicouse no Boletín Oficial do Estado a Resolución do 24 de novembro de 2020, da Secretaría de Estado de Política Territorial e Función Pública, pola que se nomean funcionarios de carreira polo sistema xeral de acceso libre, do Corpo de Enxeñeiros Técnicos Forestais ao servizo da Facenda Pública.

Os empregados e empregadas públicas deste Corpo teñen encomendadas, entre outras, as funcións de inspección, comprobación, investigación, valoración, taxación pericial e asesoramento, sobre os bens e propiedades inmobiliarias conforme ao Real Decreto 1609/1978, do 12 de maio, polo que se aproba o regulamento do Corpo de Enxeñeiros Técnicos Forestais da Facenda Pública.

Para formar parte deste Corpo é necesario estar en posesión ou en condicións de obter o título de Enxeñeiro Técnico Forestal, ou o título que habilite para o exercicio desta profesión regulada tal como establecen as bases da convocatoria, ao finalizar o prazo de presentación de instancias.

O temario do proceso selectivo consta dunha parte dedicada ao dereito Comunitario, Constitucional e Administrativo; outra de Dereito Civil e Mercantil; Instrumentos e sistemas de valoración do Catastro;Lexislación Agraria. Estrutura económica e produtividade agraria e Facenda Pública e Dereito Financeiro e Tributario.

Os procesos selectivos constan dunha fase de oposición que constará de tres exercicios, todos eles eliminatorios e dun curso selectivo na Escola da Facenda Pública do Instituto de Estudos Fiscais.