Gaur, Herri Administrazioen Negoziazio Mahai Orokorra bildu da. Bertan, administrazio publikoez gain, ordezkaritza handiena duten sindikatuak daude, eta akordio bat adostu da CCOO, UGT eta CSIFekin, telelanari buruzko artikulu berri bat sartzeko TREPen.
Akordioa administrazio publikoen zerbitzuko lan-kontratuko langileei ere aplika dakieke. Akordio horren bidez, 47. bis artikulu berri bat sartu da Enplegatu Publikoaren Oinarrizko Estatutuaren Testu Bateginean, telelana definitzeko eta hura arautzeko eta betetzen den ebaluatzeko prozedura ezartzeko. Erregulazio berri horren arabera, telelana berariaz baimendu behar da, bateragarria izango da aurrez aurreko jarduerarekin, herritarrei zerbitzuak ematen zaizkiela bermatzeko, eta borondatezkoa eta itzulgarria izango da. Gainera, Administrazioak bere jarduerarako behar dituen baliabide teknologikoak emango ditu, eta langile publikoek deskonexio digitala izateko duten eskubidea bermatuko da.
Arau-aldaketa hori Autonomia Erkidegoetako, Ceuta eta Melillako Autonomia Estatutua duten Hirietako eta FEMPeko funtzio publikoko arduradunekin eztabaidatu da Administrazio Publikoaren Konferentzia Sektorialean, eta oinarrizko lege-izaera du, eta Ministro Kontseiluan onartu beharko da, errege lege-dekretu bidez. Administrazio eskudun bakoitzak, bere jarduera-eremuan, lan-modalitate hau garatuko du, negoziazio kolektiboaren bidez.