Barne-sustapena C1 azpitaldetik A1 azpitaldera egiteko aukerari buruzkoa da kontsulta. Zehazki, adierazten da toki-erakunde batean errekurtsoak aurkeztu dituztela C1 azpitaldeko zenbait funtzionariok. Funtzionario horiek, Enplegatu Publikoaren Oinarrizko Estatutuaren Legearen testu bateginaren hirugarren xedapen iragankorrean oinarrituta (urriaren 30eko 5/2015 Legegintzako Errege Dekretuaren bidez onartu zen testu bategin hori; aurrerantzean, TRLEBEP), zuzenean sartu nahi dute A1 azpitaldera, barne-sustapenaren bidez, A2 azpitaldetik igaro gabe.

Toki-erakundearen ustez, C1 azpitaldeko barne-sustapena A2 azpitaldeari baino ezin zaio aplikatu, ez A1i, eta, horregatik, TRLEBEPen Hirugarren Xedapen Iragankorraren hirugarren atala interpretatzeko eskatzen du.

Zentzu horretan, adierazi behar da TRLEBEPen 3.1 artikuluak honako hau xedatzen duela:Toki-erakundeetako funtzionarioak estatuko legeria aplikagarriak, estatutu hau berau osatzen dutenak, eta autonomia-erkidegoetako legeriak arautzen dituzte, toki-autonomia errespetatuz.”.

Arau bereko 16.3.c) artikuluaren arabera, honako hau da barne-sustapena:Azpitalde bateko kidego edo eskala batetik (edo lanbide-sailkapeneko talde batetik, baldin eta azpitalderik ez badago) goragoko beste batera igotzea, 18. artikuluan ezarritakoaren arabera.”.

Bestalde, hirugarren xedapen iragankorraren hirugarren paragrafoak honako hau dio:Eskatzen den titulazioaren jabe diren C1 azpitaldeko funtzionarioek beren burua A taldera sustatu ahal izango dute B talde berritik igaro gabe, estatutu honetako 18. artikuluan ezarritakoaren arabera.”.

Arau hau, nolanahi ere, Kode Zibilaren 3. artikuluan aurreikusitako arau orokorren arabera interpretatu behar da. Horren arabera,arauak interpretatzeko, hitzen berezko zentzuari jarraituko zaio, testuinguruari, aurrekari historiko eta legegileei eta arauak aplikatu behar diren garaiko gizarte-errealitateari dagokienez, eta, batez ere, arauen izpirituari eta xedeari begiratuko zaie.”.

Aurrekoarekin bat etorriz, hirugarren xedapen iragankorrak berariaz egiten duen aipamenari jarraituz, beharrezkoa da 18. artikulura jotzea, administrazio publiko guztiei aplikatu beharreko barne-sustapenerako eskubidearen oinarriak jasotzen baititu, besteak beste, berdintasun-, merezimendu- eta gaitasun-printzipio konstituzionalak bermatuz. Zehazki, artikulu horren bigarren apartatuak honako hau dio:

“Sartzeko eskatzen diren baldintzak bete behar dituzte funtzionarioek; gutxienez, bi urteko antzinatasuna izan behar dute beheko azpitaldean zerbitzu aktiboan (edo lanbide-sailkapeneko beheko taldean, baldin eta azpitalderik ez badago); eta dagozkien hautaketa-probak gainditu behar dituzte”.

Oro har, adierazitakoaren argitan, sustapen bertikala beheko azpitaldetik (egungo B taldearen kasuan izan ezik, azpitalderik ez baitu) goiko azpitaldera egiten da.

Baina arau orokor horrek salbuespen bat onartzen du, hain zuzen ere hirugarren xedapen iragankorrean aurreikusitakoa: C1 azpitaldetik A taldera barne-sustapen bidez sartzea ahalbidetzen du, B talde berritik igaro behar izan gabe eta 18. artikuluan ezarritakoaren arabera. Azken agindu hori berariaz aipatzeak esan nahi du salbuespen hori barne-sustapenaren arloan indarrean dagoen arauari ahalik eta gehien egokitzen zaion moduan interpretatu behar dela, hau da, C1 azpitaldetik A2 azpitaldera bakarrik sustatu ahal dela.

Hori dela eta, jotzen da, ondorioz, ezin dela barne-sustapenez sartu C1 azpitaldetik A1 azpitaldera; C1 azpitaldetik, berriz, “goragoko hurrengo azpitaldera” igo daiteke, hau da, A2 azpitaldera.

Aurreko guztia gorabehera, gogoratu behar da, zuzendaritza nagusi honen eskumenen araubidearen arabera, zuzendaritza nagusi honek egiten dituen kontsulten erantzunak informatzeko baino ez direla, eta, ondorioz, ez direla irizpide lotesleak, ez dutela ez eskubiderik ez eskubide-itxaropenik sortzen, eta ez dutela inolako loturarik sortzen dagozkien prozedura-motekin. Gainera, nahitaezko izaera edo izaera loteslerik ez dutenez, erantzun horien hartzaile diren organoek, hala badagokio, horietan jasotako iritziarekin bat ez datorren erabakia hartu ahal izango dute azkenean.

Buletin honetan jasotzen diren kontsulten erantzunek erantzuna emateko unean indarrean dagoen araudiaren arabera planteatutako galderei erantzuten diete, eta, beraz, erantzun horiek ondorengo lege-aldaketen edo ebazpen judizialen eragina jasan dezakete.