Madrilen, 2024ko abenduaren 10ean.- Ministro Kontseiluak gaur onartu du komunikabideei 124,5 milioi euroko laguntza-plan bat, Espainiako Gobernuaren Demokraziaren aldeko Ekintza Planean jasotako neurrietako bat. Helburua da informazio eta komunikazioko bitartekoen sektorea digitalki indartzea, haien lehiakortasuna zaintzeko eta herritarrei egiazko informazioa eman ahal izateko, Espainiako Konstituzioaren 20.1 artikuluak jasotzen duen bezala.
“Komunikabideen merkatu pribatuak, eta bereziki informazioan aritzen direnek, hainbat merkatu-akats dituzte gaur egun, eta horiek higatzen ari dira herritarrek egiazko informazioa jasotzeko duten oinarrizko eskubidea, iritzi publiko aske eta informatua eratzeko oinarria dena. Egoera horren atzean bi arrazoi nagusi daude: alde batetik, mundu mailako plataforma digitalen agerpena, hedabideetatik publizitatea kendu baitute, eta, bestetik, clickbait delakoan oinarritutako estrategia komertzialak dituzten hedabide digitalen agerpena, informazioaren egiazkotasunari eta kalitateari atxikimendu eskasarekin”, azaldu du prentsaurrekoan Oscar Lopez Eraldaketa Digitalerako eta Funtzio Publikorako ministroak.
Gaur Jaurlaritzak onartu duen laguntza-paketeak erraztu egin nahi du beren negozio-eredua gizarteari informazio anitza eta egiazkoa ematean oinarritzen duten komunikabideek aukerak balia ditzaten eta murgilduta gauden olatu teknologiko eta digitalaren erronkei aurre egin diezaieten.
Horrela, Espainiako Gobernuak Europa mailako jardunbide egokien arrastoari jarraitzen dio. Europako Batzordeak agindutako Public Financing of News Media in the EU txostenaren arabera, Europan 1.320 milioi euro esleitu zitzaizkien hedabide pribatuei, Estatuko publizitatea eta BEZ murrizketak kenduta. Danimarka, Suedia, Austria, Frantzia, Italia eta Belgika daude hedabide pribatuen finantzaketa publikoa pluraltasuna eta demokrazia babesteko mekanismotzat hartzen duten herrialdeen artean.
Komunikabideei laguntzeko sei programa
Zehazki, 124,5 milioi euroko laguntza paketeari oniritzia eman dio Ministroen Kontseiluak.
Sei programetatik bi laguntza deialdiak dira, eta enpresa erakunde publikoaren Red.es bitartez zabalduko dira. Handiena, prentsa digitalki sendotzeko programa, 65 milioikoa da, hedabideek Espainiako hedabide inprimatuetan teknologia digitalak sar ditzaten laguntzeko: erabiltzaileek on line edukietarako sarbide hobea izatea, azpiegitura digitalak berritzea, eta formatu digitaletan eduki berritzaileak sortzea.
Bigarren laguntza-lerroa hedabideen Kit Digital bat izango da, 5 milioi euroko aurrekontuarekin, tokiko egunkariak indartzeko.
Hirugarren ekimenak 15 milioi euro izango ditu, zibersegurtasun-gaitasunak indartzera eta komunikabideetan alor horretako prestakuntza-ekintzetara bideratuak, eta Zibersegurtasuneko Institutu Nazionaletik (INCIBE) bideratuko da, lankidetza-hitzarmenen bidez.
Digitalizazioaren eta Adimen Artifizialaren Estatu Idazkaritzak bi laguntza-deialdi bultzatuko ditu: bata, 10 milioi eurokoa, komunikabide handi eta ertainen balio-katean IA integratzeko I+G proiektuak finantzatzeko, eta, bestea, 10 milioikoa, datuak partekatzean oinarritutako berrikuntza sustatzeko.
Paketeak 19,5 milioi euroko maileguak ditu digitalizazio-proiektuetarako eta hedabideentzako edukiak zabaltzeko eta kudeatzeko tresna teknologikoetarako, eta Transformazio Teknologikorako Espainiako Sozietateak (SETT) kudeatuko ditu.