No vídeo desta semana presentamos a Raquel, pertencente ao Servizo de Vixilancia Aduaneira, que explica que "son a policía, dentro da Axencia Tributaria, especializada na investigación de delitos de contrabando, branqueo de capitais e economía mergullada". Recomenda opositar ao Servizo de Vixilancia Aduaneira, xa que "o sacrificio e dedicación que comporta o proceso selectivo, merecerá a pena".

Os funcionarios de Vixilancia Aduaneira, homes e mulleres, teñen carácter de axentes da autoridade (policía fiscal e policía xudicial). As súas actuacións están encamiñadas á represión dos delitos e infraccións de contrabando, a loita contra o tráfico de drogas e outros delitos relacionados como o branqueo de capitais, a fraude de Impostos Especiais e outras fraudes fiscais e a economía mergullada. Por este motivo, contan cunha extensa formación en dereito administrativo, penal e procesual, comunitario, tributario, aduaneiro e lexislación sobre contrabando.

Na actualidade o persoal que compón o persoal de Vixilancia Aduaneira intégrase nos seguintes Corpos:

• Corpo de Axentes do Servizo de Vixilancia Aduaneira, especialidades de Investigación e Marítima.
• Corpo Executivo do Servizo de Vixilancia Aduaneira, especialidades de Investigación, Navegación, Propulsión e Comunicacións.
• Corpo Superior de Vixilancia Aduaneira, especialidades de Investigación, Navegación, Propulsión e Comunicacións.

A forma de ingreso para ser funcionario de Vixilancia Aduaneira realízase a través dun proceso de selección que se integra na Oferta Pública de Emprego do Estado e que, dependendo do Corpo ao que se queira optar, require unha titulación específica.

Na Área de Vixilancia Aduaneira, actualmente, desempeñan as súas funcións 1850 funcionarios, dos que 984 pertencen á especialidade de Investigación e 866 ás diferentes especialidades Marítimas. Todos eles están autorizados a portar armas, polo que entre os medios operativos cóntase con armas de dotación individual. Por outra banda, os funcionarios contan co carácter de policía xudicial, misión para a cal se utilizan equipos e tecnoloxía de vixilancia e seguimento e un sistema global de interceptación legal de comunicacións.

Vixilancia Aduaneira dispón dunha frota de 37 embarcacións (dotadas con armamento fixo) e 10 aeronaves.

Máis informacion no apartado web dedicado a Vixilancia Aduaneira da Axencia Tributaria