O Instituto Nacional de Administración Pública (INAP), como organismo que xestiona os procesos selectivos relativos a todos os Corpos e Escalas adscritos ao Ministerio de Facenda e Función Pública, encargouse en 2021 da convocatoria de 10.254 prazas para ingreso, acceso e estabilización de emprego na Administración Xeral do Estado. Para participar nos diferentes procesos selectivos recibíronse preto de 130.000 solicitudes.
Esa convocatoria recolleu algúns dos cambios contidos no documento ‘Orientacións para o cambio en materia de selección na Administración Xeral do Estado’, coa redución do número de exercicios, a unificación de probas compatibles ou a realización de máis dun exercicio no mesmo día, aínda que fosen eliminatorios.
O INAP ademais ocupouse no ano 2021 de apoiar ás persoas que están a preparar oposicións. Así, veu ofrecendo en aberto experiencias de aprendizaxe en liña ‘Ao teu ritmo’ para o apoio ao estudo con vistas ás probas de acceso, promoción interna ou estabilización do emprego temporal, ao Corpo Xeral Administrativo da Administración do Estado e ao Corpo Xeral Auxiliar da Administración do Estado.
Con vistas ao ano 2022, o 13 de decembro pasado publicouse o Plan de Formación e as súas condicións xerais para o ano 2022. Trátase dun Plan integral, que inclúe as actividades formativas dirixidas a todas as Administracións Públicas baixo o mesmo paraugas, é dicir, tanto as destinadas ao persoal da Administración do Estado, como o das entidades locais, a administración autonómica e as universidades, entre outras.
Entre as actividades formativas, destacan, ademais das que favorecen a aprendizaxe autónoma para preparar oposicións, a segunda edición do Máster Universitario en Dirección e Liderado Públicos, os pasos dados para desenvolver a formación dixital, así como as xornadas e debates sobre emprego público e o impacto do Plan de Recuperación na modernización administrativa.