No Boletín Oficial do Estado do 19 de xaneiro publicouse a Resolución do 11 de xaneiro de 2021, da Secretaría de Estado de Política Territorial e Función Pública, pola que se nomean funcionarios de carreira, polo sistema xeral de acceso libre, do Corpo de Farmacéuticos Titulares.

As empregadas e empregados públicos do Corpo de Farmacéuticos Titulares desenvolven as funcións e competencias do Estado en materia de medicamentos, produtos sanitarios, cosméticos, alimentación, saúde pública e comercio exterior.

Poden desempeñar as súas funcións en servizos centrais, no Ministerio de Sanidade, no ámbito de saúde pública; na Axencia Española de Medicamentos e Produtos Sanitarios, para a autorización, regulación e rexistro de todo tipo de medicamentos, inspección, produtos sanitarios e cosméticos e na Axencia Española de Seguridade Alimentaria.

Nos servizos periféricos, nas Áreas de Sanidade dependentes da Delegación do Goberno en cada Comunidade Autónoma: nestas realízanse labores dirixidos pola AEMPS referentes a inspección de industria (medicamentos, produtos sanitarios e cosméticos), importación/exportación de produtos farmacéuticos (exterior de UE), inspección de xéneros medicinais, inspección de cosméticos en importación/exportación, control de drogas e estupefacientes, análises de laboratorio relacionados con identidade e pureza de drogas incautadas, perito xudicial, consulta a empresas, entre outras.

Para o ingreso no Corpo é requisito estar en posesión do título de Licenciado ou Grao en Farmacia

O proceso selectivo consta de oposición, consta de oposición, concurso e curso selectivo.

A fase de oposición consiste na superación de catro exercicios, todos eles eliminatorios.

O primeiro exercicio consiste na superación dun cuestionario de 120 preguntas.

O segundo exercicio é unha tradución directa dun texto en inglés.

O terceiro exercicio consiste no desenvolvemento por escrito dun tema elixido polo aspirante de entre dous extraídos ao azar da segunda parte do programa, e dous temas de entre catro extraídos ao azar da terceira parte do programa.

O cuarto exercicio é un suposto práctico proposto polo tribunal sobre materias contidas no programa.

Na fase de concurso valoraranse os méritos conforme estableza a correspondente convocatoria.

Unha vez finalizada a fase de concurso-oposición, os aspirantes terán que superar un curso selectivo de carácter teórico práctico destinado a adquirir coñecementos e habilidades en materia de administración, regulamentación, avaliación e xestión de medicamentos e produtos sanitarios que consiste nun período formativo dun mes que se celebrará no Ministerio de Sanidade.