Madrid, 7 de marzo de 2025.- Hoxe entran en vigor as primeiras medidas da orde ministerial cuxo obxectivo é evitar estafas de suplantación de identidade a través de chamadas telefónicas e SMS, e para garantir a identificación dos números de atención ao cliente e chamadas comerciais.

Desde hoxe os operadores de telecomunicacións estarán obrigados a bloquear chamadas e SMS de números que non fosen atribuídos, asignados ou adxudicados a un servizo, a un operador ou a un cliente. Por exemplo, ese é o caso dos números que comezan por 3 ou por 4.

Así mesmo, os números 900 e 800 poderanse utilizar a partir de agora para realizar chamadas comerciais. Ata este momento, estes números podían recibir chamadas dos usuarios, pero as empresas non podían emitir chamadas.

Estas medidas están deseñadas para mellorar a protección da cidadanía e dotala con ferramentas para identificar posibles estafas. Así mesmo, facilítaselle a identificación das chamadas comerciais.

Prohibición de chamadas comerciais desde números móbiles e bloqueo de chamadas internacionais

O 15 de maio entrarán en vigor dúas novas medidas. Desde esa data estará prohibido realizar chamadas comerciais desde un número móbil. Só se poderán realizar desde numeración xeográfica, desde números especialmente atribuídos para iso, ou, como se mencionaba anteriormente, desde números 800 e 900.

Outra medida que entra en vigor o 15 de maio é a obriga para os operadores de bloquear chamadas e SMS de orixe internacional que simulan ser orixinadas nun número español, excepto as daqueles clientes que se atopan en roaming.

Por último e pola súa complexidade, hai unha medida que entrará en vigor pasados 15 meses desde a publicación da orde ministerial.

No envío de SMS ás veces utilízase unha etiqueta alfanumérica como identificativo en lugar dun número móbil. Esta é unha práctica moi estendida nas comunicacións tanto de empresas como de Administracións públicas.

A medida establece a creación dunha base de datos con eses códigos alfanuméricos, que serán, a partir desa data, rexistrados e verificados polo CNMC. Desta maneira protéxese o nome das compañías ou entidades, e localízase de forma máis rápida e eficaz calquera intento de suplantación.