26 de xullo de 2024.- Vitoria-Gasteiz será a sede do IX Cume Global da Alianza para o Goberno Aberto (OGP), unha reunión que se celebrará no outono do próximo ano e na que participarán representantes da sociedade civil, dos gobernos e líderes de todo o mundo, segundo anunciou o presidente do Goberno, Pedro Sánchez, durante a súa comparecencia no pleno extraordinario celebrado no Congreso dos Deputados para dar conta das decisións adoptadas nos Consellos Europeos do 17 e o 27 de xuño e para expor as liñas fundamentais do Plan de Acción pola Democracia. Este cume é o principal encontro a nivel internacional entre representantes das administracións públicas e da sociedade civil para tratar dos temas de goberno aberto.
A secretaria de Estado de Función Pública, Clara Mapelli, reuniuse este venres con representantes do Concello de Vitoria para iniciar a organización do evento.
Desde o 1 de outubro de 2024 e ata o 30 de setembro de 2025, España copresidirá xunto a unha representante da sociedade civil, Ceo Magno (da coalición de organizacións filipina Bantay Kita), o Comité de Dirección da Alianza para o Goberno Aberto. O ministro para a Transformación Dixital e da Función Pública, José Luís Escrivá, tivo ocasión de abordar, xunto a Magno, os asuntos principais desta copresidencia, nun dos actos realizados con motivo da Semana da Administración Aberta durante o pasado mes de xuño.
Esta Alianza nace en 2011 como unha iniciativa global dos líderes gobernamentais e defensores da sociedade civil, impulsada polo expresidente dos Estados Unidos, Barack Obama, co obxectivo de promover unha gobernación transparente, participativa, inclusiva e responsable. Inclúe a 75 países e 104 gobernos locais, que representan a máis de dous mil millóns de persoas, e miles de organizacións da sociedade civil. Cada dous anos, cada membro do comité presenta un plan de acción creado conxuntamente coa sociedade civil que describe compromisos concretos para mellorar a transparencia, a rendición de contas e a participación pública no goberno. España forma parte de OGP a nivel nacional desde o ano da súa fundación.
A Alianza para o Goberno Aberto busca a colaboración entre gobernos, sociedade civil e cidadanía, mediante o intercambio de metodoloxías innovadoras a nivel global na implementación de compromisos, iniciativas e actividades de Goberno Aberto concretas e medibles a través de plans de acción. España xa presentou catro plans de acción e está en proceso de elaboración do quinto plan, que presentará en decembro deste ano/este ano.
Para iso, durante o mes de marzo de 2024 levouse a cabo unha consulta pública na que se recibiron 80 achegas que conteñen 411 propostas, isto é 2,5 veces o número das recibidas na consulta do anterior plan. Nos meses de maio e xuño celebráronse talleres deliberativos con participación paritaria AAPP-Sociedade civil e son dez os eixos propostos como compromisos por parte das distintas administracións: participación cidadá, transparencia e acceso á información, integridade e rendición de contas, espazo cívico, administración aberta, gobernación dixital, apertura fiscal, dereito á información veraz, promoción do Goberno Aberto e Estado Aberto.