Eskubide Digitalen Gutuna egiteko kontsulta publikoa

Kontsulta honen helburua da herritarrek alderdi hauei buruz duten iritzia jasotzea, zuzenean edo erakunde ordezkatzaileen bidez:

1. Ekimenaren bidez konpondu nahi diren arazoak.
2. Beharra eta aukera.
3. Helburuak.
4. Izan daitezkeen konponbide alternatibo erregulatzaileak eta ez-erregulatzaileak.

Interesdunek oharrak eta iruzkinak egin ditzakete, kontsulta honetan espresuki planteatutako gaiei buruz ez ezik, garrantzitsutzat jotzen duten beste edozein gairi buruz ere.

Interneten eta gizarte digitalaren garapenak aldatu egin du erlazionatzeko, komunikatzeko eta gure gizarte-, lan-, ekonomia- eta kultura-jarduerak egiteko dugun modua, eta benetako iraultza eta aurrera egiteko aukera-iturri agortezina dira.

Hala ere, zenbait arrisku ere ekarri ditu, mundu digitaleko segurtasunerako, pribatutasunerako eta konfiantzarako erronka direnak, eta herritarren eskubideak eta askatasunak bermatzen dituzten neurrien bidez aurre egin behar zaienak.

Ildo horretan, Espainia izan zen Internetekin lotutako zenbait eskubide digital bermatu zituen Europako lehen herrialdea, Gobernu honek bultzatutako Datu Pertsonalak Babesteko eta Eskubide Digitalak Bermatzeko Lege Organikoari esker. Lege horrek alderdi garrantzitsuak jaso zituen, hala nola sarean ahaztua izateko eskubidea, segurtasuna eta hezkuntza digitala edo lan-eremuko deskonexio digitala.

Orain, gure helburua da herritarren eskubide digitalen espektro are zabalagoa aitortzea. Helburua da bermatzea gure offline bizitzan ditugun eskubide eta askatasunak berdin-berdin babestuta daudela online eremuan.

Gero eta digitalizatuagoak dauden gizarte eta ekonomia batean, funtsezkoa da honako gai hauei aurre egitea: pribatutasunerako eta segurtasunerako eskubidea, indarkeriaren aurkako babesa, hezkuntza, eten digitalen murrizketa, bai eta horien dimentsio laboralak eta zibilak ere. Bereziki, arreta berezia jarri behar da ziurtatzeko digitalizazioak ez dituela babesik gabe uzten ahulenak.

Botere publikoei dagokie herritarrek Interneten dituzten eskubideak gauzatuko dituzten politikak bultzatzea, gizabanakoen eta haiek osatzen dituzten taldeen arteko berdintasuna sustatuz, errealitate digitalean oinarrizko eskubideak bete-betean erabili ahal izan daitezen.

Horregatik guztiagatik, Gobernuak Eskubide Digitalen Gutuna onartu nahi du. Gutun horrek herritar guztien babes digitalerako behar diren eskubideak jasoko ditu, eta aukera emango digu, beste behin ere, Europako abangoardian jartzeko gizarte digital aske, ireki eta inklusibo baten garapenari dagokionez.

Gizarte zibilak ahalik eta parte-hartze handiena izan dezan, kontsulta publiko hau egitea proposatzen da, haren iritzia jasotzeko, bakarka edo ordezkaritza duten elkarteen bidez.

Arestian azaldutakoa kontuan hartuta,

1. Zure ustez, teknologia digital berriek nola eragiten diete herritarren eskubideei eta askatasunei?
2. Zure ustez, zer kontsiderazio etiko baloratu beharko lirateke gizarte digitalari dagokionez?
3. Zein neurri legegile edo politiko publiko proposatuko zenituzke?
4. Zehazki zer eskubide sartu edo zabaldu beharko liratekeela uste duzu?

Erantzuteko aukera gisa, ikuspuntu hauetako batetik edo batzuetatik lantzea proposatzen da:

1. Sektoriala (lan-arloa, administrazio-arloa, finantza-arloa, hezkuntza-arloa, kultura-arloa, pribatutasuna, etab. ),
2. Errealitate teknologiko berrien isla, hala nola adimen artifizialarena edo big data
3. Jasotzaileei dagokienez, bereziki kalteberak izan daitezkeen kolektiboei eta gizarteak pairatzen dituen arrakalei dagokienez (digitala, generokoa…).
4. Komunikabideak eta sare sozialak
5. Zein esparrutan sakondu eta eragin beharko litzateke lineaz kanpo gozatzen diren eskubideak linean ere errespetatuak izan daitezen bermatzeko?

Kontsulta-prozesuaren beraren parte da hainbat konponbide alternatiboren planteamendua.

Ekarpenak helbide elektroniko honetara bidali behar dira: derechosdigitales@economia.gob.es, 2020ko uztailaren 24ra arte, eta, haietan, honako hauek jasoko dira:

• Parte-hartzailearen izen-deiturak/izena edo sozietatearen izena
• Erakundea edo elkartea (hala badagokio)
• Kontaktua (posta elektronikoa)

Oro har, erantzunak ez-konfidentzialtzat hartuko dira, eta, ondorioz, libreki hedatzekoak. Isilpekotzat hartu nahi diren informazio-zatiak berariaz adierazi eta mugatu beharko dira testuan bertan.