Telekomunikazio-sareen hiri-hedapena estandarizatzeko bi UNE arau berri onartu dira
19/02/2024
Sareak kanalizatzeko sistemen ezaugarriak homogeneizatuko dituzte urbanizazio berrietarako eta irizpideak 5G duten hiri aplikazioen haririk gabeko hedapen teknologikorako.
Eraldaketa Digitalerako eta Funtzio Publikorako Ministerioak, Telekomunikazioen eta Azpiegitura Digitalen Estatu Idazkaritzaren bidez, bi UNE arau berri bultzatu ditu, telekomunikazio-sareen hiri-hedapena estandarizatzeko. Sektoreak adostu ditu, eta UNE 133100-6 eta UNE 133100-7 deitu zaie; “Telekomunikazio-sareetarako azpiegiturak” izeneko UNE 133100 seriearen parte dira.
Arau horiek sareak eraikitzeko eta bideratzeko sistemen ezaugarriak homogeneizatzen dituzte urbanizazio berrietan, eta horrek operadoreentzako optimizazio handiagoa eta hirigintza ordenatuagoa ekarriko ditu. Halaber, 5G teknologia haririk gabe hedatzeko irizpideak ezartzen dituzte, hiri adimendunetako hiri-altzariak seinalez hornitzeko.
María González Veracruz Telekomunikazioen eta Azpiegitura Digitalen Estatuko idazkariaren hitzetan, “berri ona da, irizpide teknikoak bateratzen ditugulako eta konektagarritasuneko elementu teknologiko berrien hedapena modu homogeneoan optimizatzen dugulako. Horrek eragina du hirigintza hobeago eta ordenatuago batean, operadoreentzat lan zehatzago eta eraginkorragoan, eta hiri adimendunen bidez herritarrentzako zerbitzu eta gaitasun hobeetan”.
Bestalde, Alfredo Berges UNE Espainiako Normalizazio Elkarteko presidentearen aburuz, “UNE arauek erantzun eraginkorra ematen diete Espainiako gizartearen eta sektore ekonomikoen erronka handiei, digitalizazioari adibidez. Gainera, Administrazioen laguntza sendoa dira politika publikoak inplementatzeko”.
Hartutako irizpide teknikoak
Arau berri horiek Azpiegituren UNE Azpibatzordean (CTN-UNE 133/SC 1) adostu dira. Azpibatzorde hori Telekomunikazioen eta Azpiegitura Digitalen Estatuko Idazkaritzak zuzentzen du, eta Telekomunikazio Ingeniarien Elkargo Ofizialak koordinatzen du (KOIT.), telekomunikazioen sektoreko ekosistema osoko beste 42 erakunderen parte-hartzearekin.
Bi arau horiek joan den urtarrilaren 17an argitaratu ziren, eta “Telekomunikazio-sareetarako azpiegiturak” izeneko UNE 133100 seriearen parte dira. UNE 133100-6 araua1 urbanizazio eta berrurbanizazio berrietarako multioperadore-azpiegiturak diseinatzeko irizpideak ezartzen ditu; besteak beste, topologia egokiak zehaztea eta oso ahalmen handiko komunikazio elektronikoen sareak hartzeko azpiegitura eta baliabide elkartuak dimentsionatzea (VHCN).
Bestalde, UNE 133100-7 arauak2 eremu txikietarako haririk gabeko sarbide-puntuak instalatzeko baldintza orokorrak definitzen ditu (WAP, Small Area Wireless Access Point) lehendik dauden eta kanpoko hiri-altzarietan, hala nola kanpoko argiteriaren edo seinaleen makulu eta zutabeetan, autobus-markesinetan, semaforoetan, seinaleetan eta horrelako ekipamendua ostata dezakeen beste edozein altzari publikotan.
1UNE 133100-6:2024 Telekomunikazio sareetarako azpiegiturak. 6. zatia: Urbanizazio eta berrurbanizatze berrietarako telekomunikazio-azpiegitura multioperatzaileak diseinatzeko irizpideak.
2UNE 133100-7:2024 Telekomunikazio sareetarako azpiegiturak. 7. zatia: Kanpoko hiri-altzari publikoetan eremu txikietarako haririk gabeko sarbide-puntuak instalatzeko sistemak.