Clara Mapelli eta Mayte Ledo, Transformazio Digitalerako eta Funtzio Publikoko Ministerioko Estatu idazkari berriak

Ministroen Kontseiluak, Transformazio Digitalerako eta Funtzio Publikorako Ministerioak proposatuta, Funtzio Publikoko eta Digitalizazioko eta Adimen Artifizialeko estatu-idazkari berriak izendatu ditu, baita Ministerioaren idazkariordea eta kabineteko burua ere.

Clara Mapelli Marchenak, egun Gobernantza Publikoko zuzendari nagusiak, Funtzio Publikoko Estatu Idazkaritzaren zuzendaritza hartu du bere gain. Estatuko Administratzaile Zibilen kidegokoa da, eta Zuzenbidean doktorea da Madrilgo Unibertsitate Autonomoan. Hainbat ministeriotan erantzukizunezko postuak izan ditu, hala nola Ikasketa Politiko eta Konstituzionalen Zentroko Azterlan eta Ikerketa Zuzendariordetzan, Presidentetzako, Gorteekiko Harremanetako eta Memoria Demokratikoko Ministerioko Idazkaritza Nagusi Teknikoan edo Justiziako Estatu idazkariaren Kabineteko Zuzendaritzan.

Bestalde, Mayte Ledo Turielek, orain arte Transformazio Digitalerako eta Funtzio Publikorako ministroaren kabineteko zuzendaria izan denak, Digitalizazioko eta Adimen Artifizialeko Estatu idazkari kargua hartuko du. Aurretik, BBVAko kostuen eta inbertsioen arduraduna izan zen, eta hainbat ardura postu bete zituen erakundean. Ekonomia Zientzietan lizentziatu zen Valladolideko Unibertsitatean, eta graduondoko ikasketak egin zituen Moneta eta Finantza Ikasketen Zentroan (CEMFI), eta Analisi Ekonomikoko doktoretza-ikastaroak egin zituen Madrilgo Unibertsitate Konplutentsean.

Horrez gain, Ministroen Kontseiluak Iria Álvarez Besteiro izendatu du Transformazio Digitalerako eta Funtzio Publikorako Ministerioaren idazkariorde. Zuzenbidean eta Enpresen Administrazio eta Zuzendaritzan lizentziaduna eta Estatuko Merkataritza Teknikarien eta Ekonomisten Goi Mailako Kidegokoa. 2020tik 2023ko azarora arte, idazkari nagusi tekniko gisa lan egiten zuen Inklusio, Gizarte Segurantza eta Migrazio Ministerioan, eta 2023ko azarotik Transformazio Digitaleko idazkariordea zen.

Azkenik, Ministroen Kontseiluak Agustina Piedrabuena Moraleda izendatu du Transformazio Digitalerako eta Funtzio Publikorako ministroaren kabineteko zuzendari. Orain arte, Ministroaren kabineteko kide aholkularia izan da, eta, aurretik, Ekonomia eta Transformazio Digitaleko Ministerioan eta Aurrerapen Digitalerako eta Telekomunikazio eta Azpiegitura Digitaletarako Estatu Idazkaritzetan jardun du. Telekomunikazioetako goi-ingeniaria da, sektore pribatuan lan egin du Telefonican, Ericssonen, Telefónica Móvil-en eta Altran SDBn, eta Gaztela-Mantxako Gobernuko Informazioaren eta Telekomunikazioen Gizarterako zuzendari nagusia izan da.

Ikusi prentsa-oharra [PDF] [134.56 kB]