Ikus-entzunezko Zuzentarau berriaren transposizioa egiteko aurretiazko kontsulta publikoa ireki du Gobernuak

Europar Batasuneko zuzentarau berriaren transposizioak ikus-entzunezko sektorearen erregulazio nazionala eguneratzea ekarriko du. Ikus-entzunezko sektoreko eragileek eta gainerako interesdunek ekarpenak egin ahal izango dituzte 2019ko otsailaren 22ra arte. 2019ko urtarrilaren 21a.- Ekonomia eta Enpresa Ministerioak kontsulta publiko bat hasi du, ikus-entzunezko sektoreko eragileen eta gainerako interesdunen iritzia jasotzeko Parlamentuaren eta Kontseiluaren 2018ko azaroaren 14ko 2018/1808 (EB) Zuzentarauaren transposizioari buruz. Transposizioak aldatu egiten du 2010/13/EB Zuzentaraua, ikus-entzunezko komunikazio-zerbitzuak emateari buruz estatu kideek dauzkaten lege-, erregelamendu- eta administrazio-xedapen jakin batzuk koordinatzeari buruzkoa (Ikus-entzunezko komunikazio-zerbitzuen zuzentaraua), merkatuko errealitateen bilakaera kontuan hartuta. Zuzentarau hori Europar Batasuneko Egunkari Ofizialean argitaratu eta hogei egunera jarri zen indarrean, eta estatu kideek 21 hilabete dituzte transposizioa egiteko. Ikus-entzunezko zuzentarau berriak dakartzan berrikuntza nagusien artean, nabarmentzekoa da ikus-entzuleen babesa, oro har, eta adingabeena, bereziki, indartzea; horretarako, erregulazioaren aplikazio-eremua erabiltzaileek plataformen bidez sortutako bideoak trukatzeko zerbitzuetara eta sare sozialetara zabalduko da, betiere horien antzeko zerbitzuak eskaintzen badira. Horrez gain, harmonizatu egin dira ikus-entzunezko zerbitzu linealen, eskaripeko bideo-zerbitzuen eta erabiltzaileek plataformen bidez sortutako bideoak trukatzeko zerbitzuen erregulazioa. Zuzentaraua nazioko legegintza-esparrura ekartzeko prozesua Ikus-entzunezko Komunikazioari buruzko martxoaren 31ko 7/2010 Lege Orokorra aldatzea izango da, eta Aurrerapen Digitalerako Estatu Idazkaritzak koordinatuko du. Aurretiazko kontsulta publikoaren helburua 25 galderatan egituratuta dago, eta ikus-entzunezko sektoreko eragileek, administrazio publikoek, ikus-entzunezkoarekin lotutako beste sektore batzuetako eragileek, kontsumitzaile eta erabiltzaileen elkarteek eta gizarte osoak eman ditzaketen hasierako ekarpenak edukitzea da, Europako Erkidegoko araudia Espainiako ordenamendu juridikora ekartzeari buruz. Egin nahi diren ekarpenak 2019ko otsailaren 22ra arte bidali ahal izango dira, secretariacontenidos@mineco.es helbide elektronikoaren bidez. Kontsultaren baldintzak eta egindako galderak web orrian daude eskuragarri https://avancedigital.gob.es/es-es/Participacion/Paginas/index.aspx.