• Por cada euro achegado pola Administración española, a Comisión Europea achega a mesma cantidade, polo que neste programa vanse a investir máis de 124 millóns de euros
• As catro entidades beneficiarias son o Instituto de Ciencias Fotónicas; a Universidade Politécnica de Valencia; o Centro Nacional de Microelectrónica e a Universidade de Vigo
• España quere reforzar o ecosistema nacional de fotónica, xa que esta tecnoloxía permite desenvolver chips máis rápidos e con menor consumo enerxético, grazas ao uso da luz (fotóns) en lugar de electróns

Vigo, 31 de xullo de 2025.- O ministro para a Transformación Dixital e da Función Pública, Óscar López, anunciou hoxe en Vigo a adxudicación de 62,1 millóns de euros da Liña Piloto de Fotónica Integrada, unha convocatoria cuxo obxectivo é fortalecer a soberanía tecnolóxica europea no sector dos semiconductores. O programa mobilizará en total 124,2 millóns de euros porque por cada euro achegado pola Administración española, a Comisión Europea achega a mesma cantidade.

“Con este investimento, España reforza o ecosistema e a cadea de valor da fotónica en territorio nacional, abarcando desde o deseño e a fabricación ata o empaquetado e o testeo de chips. O obxectivo non é só alcanzar a autosuficiencia tecnolóxica, estamos a desenvolver capacidades industriais e creando emprego”, asegurou o ministro.

Durante a súa visita a Vigo, o ministro Óscar López, acompañado do secretario de Estado de Telecomunicacións e Infraestruturas Dixitais, Antonio Hernando, visitou a empresa española de fotónica Sparc, na que hai apenas unhas semanas o Goberno realizou un investimento de 17,2 millóns de euros a través da Sociedade Española para a Transformación Tecnolóxica, SETT.

O ministro lembrou que este investimento tamén contribúe a fortalecer o ecosistema tecnolóxico dos semiconductores en España, xa que a empresa porá en marcha unha planta en Vigo dedicada á fabricación de circuítos integrados fotónicos, que permitirá crear 200 empregos directos e 550 indirectos. Desta maneira, Sparc cubrirá parte do déficit produtivo de semiconductores en Europa, e contribuirá ao obxectivo do European Chips Act de alcanzar unha cota do 20% para 2030.

Ecosistema de fotónica

A diferenza da electrónica, un sector xa consolidado na industria tecnolóxica, a fotónica constitúe aínda un ámbito emerxente, cun enorme potencial de desenvolvemento. Diferénciase en que utiliza a luz (fotóns) en lugar de electróns para procesar e transmitir información, o que se traduce en maiores velocidades e un menor consumo enerxético.

Os organismos adxudicatarios da convocatoria Liña Piloto de Fotónica Integrada e o investimento total, tendo en conta a adxudicación do Goberno e a achega da Comisión Europea, son as seguintes:

• Instituto de Ciencias Fotónicas (ICFO): 23,1M€ adjudicado, recibirá 46,2 M€ en total
• Universidade Politécnica de Valencia: 16,5 M€ adxudicado, investimento total de 33M€
• Centro Nacional de Microelectrónica (CNM): 15M€ adxudicado, investimento total 30M€
• Universidade de Vigo: 7,5 M€ adxudicado, 15M€ investimento total

Cada entidade abordará unha fase específica do proceso tecnolóxico, desde o desenvolvemento de kits de deseño ata a fabricación de chips híbridos, aceptación de equipos ou integración con tecnoloxías de radiofrecuencia e 5G, entre outras aplicacións.

A Liña Piloto de Fotónica Integrada é unha convocatoria que se enmarca nos Chips Joint Undertaking (Chips JU), unha entidade conxunta da Comisión Europea e os estados membros. A Liña ten un orzamento total de 380 millóns de euros e unha duración prevista de cinco anos. Conta coa participación de oito Estados Membros, entre os que destaca o papel de España como coordinador, con grandes centros especializados. España, ademais, absorbe aproximadamente o 33% do orzamento total.