Madrid, 10 de xaneiro de 2025.- Un total de 4.260 persoas con discapacidade intelectual optarán este sábado a unha das 455 prazas ofertadas como persoal laboral fixo do grupo profesional E0 na Administración Xeral do Estado (AGE), nun proceso selectivo convocado pola Secretaría de Estado de Función Pública e organizado polo Instituto Nacional de Administración Pública (INAP).

Realizarase unha proba única da fase de oposición, ás 10,30 horas e en catro provincias (A Coruña, Madrid, Sevilla e Zaragoza). As persoas que superen o proceso selectivo realizarán tarefas complementarias de apoio.

Estas convocatorias presentan unha especial complexidade, posto que os aspirantes deben ter recoñecido polos órganos competentes das distintas comunidades autónomas un grao de discapacidade intelectual igual ou superior ao 33%.