Madrilen, 2024ko urriaren 14an.- Eraldaketa Digitalerako eta Funtzio Publikorako ministro Óscar Lópezek nabarmendu du Adimen Artifizialaren Estrategia Nazionalak (IA) eta Demokraziaren Aldeko Ekintza Planak betetzen dutela desinformazioaren ondorioei aurre egiteko eginkizuna, “iraultza digital honetan azkartasuna eta irismena biderkatzeko aprobetxatzen ari baita”. Editoreen Klub Irekiak (CLABE) antolatutako Desinformazioaren Aurkako II. Jardunaldian egindako hitzaldian azpimarratu duenez, Gobernuak “egiazko informazioa jasotzeko eskubidea bermatzen duen Espainiako Konstituzioaren 20. artikulua bete ahal izateko berme demokratikoko baldintzak sortzeko ardura” du.
Óscar Lópezek azaldu duenez, IAren Estrategia Nazionalaren xedea da teknologia horren erabilera bultzatzea, baina baita “okerreko eskuetan erortzen denean” dakartzan arriskuak prebenitzea ere, hala nola irudiak faltsutzea, jabetza intelektualaren arloko arau-hausteak egitea edo ‘fake news’ak zabaltzea. Demokraziaren Aldeko Ekintza Planari dagokionez, Lópezek gogorarazi du bere helburuen artean dagoela “komunikabideen erregistro bat eta leihatila bakarra sortzea, haien jabetzari eta jasotako publizitate-inbertsioari buruz informatzeko”, “herritarrek jakin dezaten norenak diren hedabideak eta zer interes-gatazka gerta daitekeen haien lanaren atzean”. “Gardentasunak modu eraginkorrean indargabetzen ditu argitaletxeen esku-sartze arriskuak”, laburbildu du.
Lopezek gogorarazi duenez, Planak Kazetarien Sekretu Profesionalaren Legea ere jasotzen du, “haien iturriak babesteko berme juridiko gisa”, eta 100 milioi euroko finantzaketa hedabideentzat, “haien produktibitatea eta zibersegurtasuna hobetzeko”. Finantzaketa horrek sendotasuna, modernizazioa eta balio erantsia emango dizkio kazetaritza profesional eta independenteari. Hedabideek milioika eta milioika erabiltzaileri mota guztietako edukiak irizpiderik gabe partekatzen dizkieten kanal informalekin lehiatu ahal izateko”. Era berean, Planak aurreikusten du Diputatuen Kongresuan desinformazioari buruzko batzorde berri bat sortzea eta hauteskunde-legea erreformatzea, hauteskunde-eztabaidak egitea nahitaezkoa izan dadin, alderdi politikoek ere “laguntza izan dezaten eta gardentasunarekin eta aniztasun demokratikoarekin konpromisoa har dezaten” –azaldu zuen ministroak–.