Andaluziak, Kantabriak, Aragoik, Kanariar Uharteek, Extremadurak eta Gaztela eta Leonek probetarako Radar COVID aplikazioa jarri dute martxan

RadarCOVID aplikazioa probaldian dago dagoeneko lau autonomia-erkidegotan. Aplikazioaren eta haren osasun-sistemen arteko integrazio teknikoko prozesua osatu ondoren, Andaluzia, Kantabria, Aragoi, Kanariak, Extremadura eta Gaztela eta Leon dira garapena erabat operatibo duten lehen eskualdeak.

Atzo, asteazkena, Osasun Sistema Nazionaleko Lurraldearteko Kontseiluak akordio bat onartu zuen egokitze-prozesu hori amaitzen duten autonomia-erkidegoek probetan jarduteko aukera izan dezaten. Garapenaren ezarpena bizkortzea ahalbidetzen duen aldi baterako akordioa da, autonomia bakoitzeko osasun administrazioen eta Osasun Ministerioaren arteko aldebiko hitzarmenen bidez berretsi beharko dena.

Aplikazioaren ezarpen nazionaleko planaren lehen urratsa da. Gaur egun, aplikazioak bi milioi deskarga inguru ditu dagoeneko Android eta iOS sistema eragileetarako bertsioetan.

Une honetan, gainerako autonomia-erkidegoek adierazi dute tresna erabiltzeko interesa dutela, eta aplikazioa beren osasun-sistemekin integratzeko behar den lan teknikoa egiten ari dira, datozen asteetan martxan jarri ahal izateko.

Ekonomia Gaietako eta Transformazio Digitaleko Ministerioko Digitalizazio eta Adimen Artifizialeko Estatu Idazkaritzak egindako RadarCOVID kontaktuen alerta-aplikazioaren garapena ekainaren 23an onartu zuen Ministroen Kontseiluak. Sei egun geroago, pilotu bat jarri zen martxan Kanarietako La Gomera uhartean, kontaktu estuetan kutsatzeak detektatzeko tresna eraginkorra dela frogatzeko, positibo irudikatuak dituen fikziozko berragerraldi egoera baten aurrean.

Nola funtzionatzen du aplikazioak

RadarCOVID aplikazioa erabiltzaileen pribatutasuna gehien bermatzen duten estandar teknikoei jarraituz garatu da, Europako Batzordeak egindako gomendio guztiak betez. Hala, ezin da erabiltzailerik identifikatu edo lokalizatu, ez dagoelako inolako daturik erregistratuta eta prozesu guztia zure telefonoan garatzen delako inongo zerbitzarirantz irten gabe. Gainera, aplikazioa erabiltzea eta kutsatze baten berri ematea borondatezkoak izango dira beti.

Aplikazioak terminalaren Bluetooth konexioa erabiltzen du; horren bidez, mugikorrek aldizka aldatzen diren beste telefono batzuen identifikatzaile anonimoak igortzen eta behatzen dituzte. Bi terminal 15 minutuz edo gehiagoz elkarrengandik bi metro edo gutxiagora egon direnean, biek gordetzen dute besteak igorritako identifikatzaile anonimoa.

Erabiltzaileren bati PCR testa egin ondoren COVID-19aren positibo diagnostikatuko balitzaio, erabakiko luke ea baimena eman ala ez osasun-sistemaren bidez jakinarazpen anonimo bat bidali ahal izateko. Hala, gaixoarekin harremanetan egon diren sakelako telefonoek abisua jasoko lukete, kutsatzeko arriskua zenbatekoa izan daitekeen jakiteko, eta nola jokatu behar den azalduko lukete. Inolako daturik eskatzen ez denez, ezinezkoa da inolako erabiltzailerik identifikatzea edo aurkitzea.

Gaur egun, Europako Batzordea eredu deszentralizatuan oinarritutako aplikazioen arteko elkarreragingarritasuna posible egingo duen esparru legal eta teknikoa garatzen ari da, RadarCOVIDen kasuan bezala, estatu bakoitzeko mugetatik harago funtzionatzen jarraitu ahal izateko. Espainiako Gobernuak eredu elkarreragile baten alde egin du lehen unetik, tresna mota horien irismena zabaltzeko.