O Plan Nacional de Competencias Dixitais é un dos plans centrais da Axenda España Dixital 2025, xunto ao Plan de Dixitalización de Pemes e o Plan de Dixitalización das Administracións Públicas. Os tres plans contarán cun investimento público de máis de 11.000 millóns de euros para os próximos tres anos co obxectivo de impulsar as reformas e transformacións necesarias para avanzar no proceso de dixitalización de España.

Este Plan desenvolve os compoñentes 19, 20 e 21 do Plan de Recuperación, Transformación e Resiliencia e ten como obxectivo alcanzar un nivel de capacitación dixital entre a cidadanía española que estea á altura do reto do proceso de dixitalización.

Consta de sete liñas de actuación:

1. A capacitación dixital da cidadanía con especial énfase en colectivos en risco de exclusión dixital
2. A loita contra a fenda dixital de xénero
3. A dixitalización da educación e o desenvolvemento das competencias dixitais para a aprendizaxe
4. A formación en competencias dixitais ao longo da vida laboral para persoas desempregadas e ocupadas do sector privado.
5. A formación en competencias dixitais para o emprego público.
6. O desenvolvemento de competencias dixitais para as pemes.
7. O fomento de especialistas TIC (tanto titulados de Formación Profesional como universitarios).

No ámbito do emprego público resulta destacable a liña 5, que prevé o establecemento dun Programa de Capacitación dixital das Administracións Públicas, o despregamento polo Ministerio de Política Territorial e Función Pública dun plan de renovación de perfís dixitais do persoal público e un modelo de captación nos procesos selectivos que teña en conta as competencias relacionadas coa capacitación dixital, tanto en materias de carácter xeral como específicas.