Na lexislatura municipal actual, os 8.131 concellos españois contan con 58.734 representantes locais, dos que 34.756 son concelleiros (59,18%) e 23.978 concelleiras (40,82%), é dicir, máis ou menos, de cada dez edís, hai algo máis de catro concelleiras e case seis concelleiros.
As corporacións locais españolas, en xeral, deron pasos importantes cara á igualdade durante a democracia, se ben, aínda non é plena. A diferenza é maior nas alcaldías, ao rexistrarse practicamente unha rexedora municipal por cada catro rexedores: 1.768 alcaldesas (21,74%) e 6.363 alcaldes (78,26%).
A evolución deixa atrás peores rexistros. Hai que lembrar que na primeira lexislatura democrática municipal (1979), a muller practicamente non contaba con presenza municipal: as concelleiras representaban o 3% e as alcaldesas o 1%.
Todas as lexislaturas rexistraron, de forma lenta, unha evolución positiva: na segunda, 2% alcaldesas e 5% concelleiras; na terceira, 3% alcaldesas e 8% concelleiras; na cuarta, 5% alcaldesas e 12% concelleiras; na quinta, 7% alcaldesas e 17% concelleiras; na sexta, 10% alcaldesas e 23% concelleiras; na sétima, 13% alcaldesas e 28% concelleiras; na oitava 16% alcaldesas e 23% concelleiras; na novena, 18% alcaldesas e 35% concelleiras; na décima, 20% alcaldesas e 38% concelleiras; ata chegar á undécima e actual lexislatura, 22% alcaldesas e case unhas 41% concelleiras.