O Consello de Ministros, na súa reunión do martes 6 de outubro, aprobou un Acordo polo que se autoriza o pago dunha contribución voluntaria por importe de 88.000 euros á Alianza para o Goberno Aberto.

Esta contribución é unha aposta polo Goberno Aberto nas súas tres vertentes principais: transparencia, participación e rendición de contas.

A Alianza para o Goberno Aberto lanzouse formalmente en 2011, con oito gobernos fundadores (Brasil, Indonesia, México, Noruega, Filipinas, Sudáfrica, Reino Unido e Estados Unidos).

A Alianza busca que, de maneira sostida, os gobernos sexan máis transparentes, rendan contas e melloren a capacidade de resposta cara aos seus cidadáns, co obxectivo de mellorar a calidade do goberno, así como a calidade dos servizos que reciben os cidadáns.

Na actualidade, a Alianza para o Goberno Aberto conta con 78 países participantes de todo o mundo e 20 gobernos rexionais. España forma parte da Alianza desde o ano 2011 e, desde entón, presentou tres plans de acción.

O III Plan de Goberno Aberto estendíase desde 2017 ata 2019. Nestes momentos trabállase na elaboración do IV Plan de Goberno Aberto que se aprobará nas próximas semanas.