O teléfono 060, que informa de todos os trámites e servizos da Administración Xeral do Estado (AGE), atendeu durante todo o ano 2020 un total de 12.794.269 de chamadas de cidadáns e cidadás, un 18% máis que as chamadas rexistradas no ano 2019, no que se recibiron 10.799.961 chamadas.

O 060 é unha canle de atención telefónico da AGE que dispón dunha plataforma de telefonía de rede intelixente que dá soporte á cidadanía as 24 horas todos os días do ano, e atende nun primeiro nivel directamente de forma centralizada as chamadas dos cidadáns.

Grazas a un só número, 060, as persoas poden ser atendidas sobre servizos e procedementos da AGE, sen necesidade de desprazarse e sen ter que coñecer os números de atención de cada servizo administrativo nos distintos ministerios e organismos do Estado.

O Ministerio de Política territorial e Función Pública impulsou a integración e unificación no 060 dos distintos números de atención telefónica da Administración Xeral do Estado co fin de racionalizar recursos e facilitar a relación cos cidadáns.

Desta forma, nos últimos nove anos as chamadas ao 060 practicamente multiplicáronse por 6, pasando de 2,2 millóns en 2011 a máis de 12 millóns en 2020.

O 060 integra na actualidade máis de 230 liñas telefónicas de distintos órganos administrativos e máis de 25 servizos de atención ao cidadán, entre eles, a atención a vítimas do terrorismo, pago de multas de tráfico, cita previa en xefaturas de tráfico, denuncias á policía, tramites de estranxeiría, cita previa de DNIe e pasaporte, atención meteorolóxica, cita previa, información sobre emprego público, servizos de emerxencia ou información sobre trámites e servizos dos ministerios.

O aumento nas chamadas durante 2020 explícase en parte pola incorporación do servizo de cita previa nas oficinas de información e atención ao cidadán da AGE e pola integración no 060 das oficinas de MUFACE para o servizo de cita previa. En total, ata o momento, 32 oficinas de MUFACE integráronse neste servizo.

No que respecta a estes primeiros meses de 2021, atendeuse a 1.649.607 chamadas. Os servizos máis demandados no teléfono 060 son cita previa de DNI e pasaporte, asuntos e trámites da Dirección Xeral de Tráfico e trámites con MUFACE.

Ademais, desde o 1 de xaneiro de 2021 atópase en funcionamento o servizo telefónico “Brexit 060”, co obxectivo de informar en relación co impacto da saída do Reino Unido que se produciu o 31 de decembro de 2020. A información principal xira en torno a temas como Residencia, Asistencia sanitaria, Permiso de Conducir, Universidade, Viaxar e Empresas e unha opción adicional para poder realizar outras consultas