Lan kontratupeko irakaslea izanik, diziplina espediente bidez kaleratu ostean enplegu publikoa lortzeko aukerari buruzkoa da kontsulta.

Enplegatu Publikoaren Oinarrizko Estatutuaren Legearen testu bategina onartzen duen urriaren 30eko 5/2015 Legegintzako Errege Dekretuaren 56. artikuluak enplegu publikoa eskuratzeko baldintza orokorrak ezartzen ditu. Horien artean dago “diziplina-espediente bidez edozein administrazio publikoren zerbitzutik edo autonomia-erkidegoetako konstituzio- edo estatutu-organoetatik bereizita ez egotea, ezta, ebazpen judizialaren arabera, enplegu edo kargu publikoetarako desgaikuntza erabatekoa edo berezia izatea ere, funtzionarioen kidegoan edo eskalan sartzeko, edo langile lan-kontratudunen kasuan, bereiziak edo desgaituak izan diren lanpostuaren antzeko eginkizunak betetzeko”.

Bestalde, TRLEBEPen 96. artikuluak, alde batetik, funtzionarioak zerbitzutik kentzeko zehapena aipatzen du, eta, bestetik, langile lan-kontratudunak diziplinazko kaleratzearen zehapena. Beraz, izaera ezberdineko bi zigor dira, bi langile mota ezberdinei dagozkien heinean.

Zehazki, diziplinazko kaleratze zigorra “beste lan-kontratu baten titular izateko gaitasungabetzea ekarriko du, lehen betetzen zituzten funtzioen antzekoekin”.

Hala, lan-kontratudun langileak diziplinaz kaleratzeko zehapenaren irismena langile horiek egiten zituzten funtzioen antzekoak egiteko ezgaitzera mugatzen da. Ez da, beraz, edonolako enplegu publikora iristeko biziarteko ezintasuna, baizik eta betetzen zituen antzeko funtzioekiko lan-kontratu berri baten titular izateko desgaikuntza.

Aurreko guztia gorabehera, gogoratu behar da, zuzendaritza nagusi honen eskumenen araubidearen arabera, zuzendaritza nagusi honek egiten dituen kontsulten erantzunak informatzeko baino ez direla, eta, ondorioz, ez direla irizpide lotesleak, ez dutela ez eskubiderik ez eskubide-itxaropenik sortzen, eta ez dutela inolako loturarik sortzen dagozkien prozedura-motekin. Gainera, nahitaezko izaera edo izaera loteslerik ez dutenez, erantzun horien hartzaile diren organoek, hala badagokio, horietan jasotako iritziarekin bat ez datorren erabakia hartu ahal izango dute azkenean.

Buletin honetan jasotzen diren kontsulten erantzunek erantzuna emateko unean indarrean dagoen araudiaren arabera planteatutako galderei erantzuten diete, eta, beraz, erantzun horiek ondorengo lege-aldaketen edo ebazpen judizialen eragina jasan dezakete.