Kontsultaren gaia honako hau da: ea kidego batean emandako denbora kontuan hartzen den gerora sartu den kidego berri baten gradu pertsonala finkatzeko. Zehazki, Estatuko Administrazio Orokorreko Kidego bateko A1 Azpitaldeko funtzionario baten hasierako maila finkatzeko, autonomia-erkidego bateko funtzionario gisa aitortuta dituen zerbitzuak kontuan har daitezkeen galdetu da, baita A1 Azpitaldekoa ere.

Gradu pertsonala finkatzeko, kontuan hartzen da kidego edo eskala jakin batekoa izatea, horixe baita karrera profesionalaren garapenaren erakusgarri; beraz, agerikoa da beste kidego edo eskala batean finkatutako gradua gordetzeko eskubidea, edo beste kidego edo eskala horietan emandako zerbitzu-denbora erabiltzeko eskubidea, lortutako kidegoko edo eskalako gradu bat lortzeko, arau orokorraren salbuespenak direla, eta legeak finkatutako termino zorrotzetan aplikatu behar direla.

Arau orokor horretatik kanpo geratzen den bakarra barne-sustapenerako eta beste kidego edo eskala batera sartzeko ezarritako sistema da; izan ere, Funtzio Publikoa Erreformatzeko Neurriei buruzko abuztuaren 2ko 30/1984 Legearen 22.1 artikuluak aurreikusten du barne-sustapenaren bidez kidego edo eskala batera sartzen diren funtzionarioek edo beste kidego edo eskala batzuetara integratuta sartzen diren funtzionarioek gradu pertsonal finkatua mantenduko dutela, lege horretan aurreikusitakoarekin bat etorriz. Bi kasu tasatu dira eta arau orokorrarekiko salbuespena dira, hau da, gradu pertsonala hura finkatzen den Kidego edo Eskalarekin lotzea.

Ondorioz, gradu pertsonala funtzionarioaren administrazio-karrerako elementu bat da Kidego edo Eskala batean eta, legean aurreikusitako kasuetan izan ezik (barne-sustapena eta integrazioa), ezin izango da gradu pertsonala Kidego batetik bestera eraman. Ez dago ulertzerik, beraz, gradu pertsonala ezinbestean lotuta egotea funtzionario publikoaren izaerarekin, edozein dela ere kidegoa.

Horiek horrela, ondorioztatu egiten da ez dela bidezkoa interesdunak autonomia-erkidego bateko kidego bateko funtzionario gisa emandako zerbitzuak zenbatzea gerora sartu den Estatuko Administrazio Orokorreko kidego bati dagokion hasierako gradu pertsonala finkatzearen ondoreetarako.

Aurreko guztia gorabehera, gogoratu behar da, zuzendaritza nagusi honen eskumenen araubidearen arabera, zuzendaritza nagusi honek egiten dituen kontsulten erantzunak informatzeko baino ez direla, eta, ondorioz, ez direla irizpide lotesleak, ez dutela ez eskubiderik ez eskubide-itxaropenik sortzen, eta ez dutela inolako loturarik sortzen dagozkien prozedura-motekin. Gainera, nahitaezko izaera edo izaera loteslerik ez dutenez, erantzun horien hartzaile diren organoek, hala badagokio, horietan jasotako iritziarekin bat ez datorren erabakia hartu ahal izango dute azkenean.

Buletin honetan jasotzen diren kontsulten erantzunek erantzuna emateko unean indarrean dagoen araudiaren arabera planteatutako galderei erantzuten diete, eta, beraz, erantzun horiek ondorengo lege-aldaketen edo ebazpen judizialen eragina jasan dezakete.