• Con esta achega, o Executivo pretende apoiar a cooperación global en gobernación da Intelixencia Artificial
• “Hoxe damos un paso máis no liderado de España na axenda dixital multilateral. Non queremos usar a tecnoloxía para dividir países, senón para multiplicar oportunidades”, destacou Óscar López

O ministro para a Transformación Dixital e da Función Pública, Óscar López, formalizou hoxe con Amandeep Singh Gill, subsecretario xeral e enviado especial das Nacións Unidas para as Tecnoloxías Dixitais e Emerxentes, a contribución voluntaria de 3 millóns de euros á Oficina de Tecnoloxías Dixitais e Emerxentes (ODET) da ONU, recentemente aprobada polo Consello de Ministros, que ten como obxectivo apoiar a cooperación global en gobernación da intelixencia artificial (IA).

Amandeep Singh Gill agradeceu “ao Goberno de España o seu firme compromiso e a súa contribución aos esforzos da ONU no ámbito da cooperación na gobernación da IA. A contribución axudará a avanzar as recomendacións que fixo o Órgano Consultivo de Alto Nivel do secretario xeral o ano pasado no seu informe final ‘Gobernación da IA en beneficio da humanidade’”. Ademais, destacou que o acordo fortalecerá a cooperación internacional para aproveitar o potencial da IA en beneficio das persoas e o planeta, asegurando ao mesmo tempo, o respecto polas normas internacionais e os dereitos humanos”.

“Hoxe damos un paso máis no liderado de España na axenda dixital multilateral. En tempos de tensión xeopolítica, guerras comerciais e oligopolios tecnolóxicos, lanzamos unha gran mensaxe: Non queremos usar a tecnoloxía para dividir países, senón para multiplicar oportunidades”, destacou pola súa banda o ministro Óscar López.

Con este acto de firma, no que tamén participou a secretaria de Estado de Dixitalización e Intelixencia Artificial, María González Veracruz, España proponse asegurar que o modelo de innovación responsable que está a aplicar para a intelixencia artificial, teña impacto e alcance internacional. De feito, trátase da contribución voluntaria máis ambiciosa que ningún país fixo ata agora á ONU en materia de Gobernación de IA.

Continuando co compromiso do Goberno de España coa recuperación e reconstrución tras a DANA, a ODET establecerá a división na sede da Oficina das Nacións Unidas de Servizos para Proxectos (UNOPS) situada en Valencia. Estará dedicada á investigación en elaboración de normas e políticas de IA, clasificación de riscos, así como o apoio ao secretariado das diferentes iniciativas coincidindo co seguimento do Pacto Dixital Global durante os próximos dous anos.

Reunión do Consello Asesor Internacional de IA

Por outra banda, o subsecretario xeral e enviado especial das Nacións Unidas para as Tecnoloxías Dixitais e Emerxentes, uniuse ao segundo encontro dos once expertos que integran o Consello Asesor Internacional de Intelixencia Artificial convocado onte e hoxe polo Ministerio para a Transformación Dixital e da Función Pública, co obxectivo de avanzar no avanzar no despregamento dunha tecnoloxía ao servizo das persoas e o progreso.

No marco da reunión do Consello, Amandeep Singh Gill tamén se reuniu con representantes do ecosistema español convocados polo Ministerio, tanto do ámbito académico como do sector industrial e da sociedade civil, que compartiron as súas consideracións no contexto do diálogo internacional que promove Nacións Unidas en materia de Gobernación de IA.