No Boletín Oficial do Estado de hoxe 30 de xuño publicouse a Resolución do 24 de xuño de 2021, pola que nomean funcionarios de carreira do Corpo Especial Facultativo de Mariña Civil.

Trátase dun corpo da Administración Xeral do Estado adscrito ao Ministerio de Transportes, Mobilidade e Axencia Urbana (Administración marítima) entre cuxas funcións destacan as do control da seguridade marítima da navegación e da vida humana no mar, o transporte e tráfico marítimo, a coordinación de salvamento no mar e prevención e loita contra a contaminación do medio ambiente mariño, sen prexuízo das competencias do Ministerio de Defensa e doutras autoridades.

Así mesmo ocúpanse da inspección das funcións operacionais dos buques civís, as súas tripulacións e mercadorías, os seus aparellos, materiais, equipos, máquinas mariñas, instalacións tanto radioeléctricas como de prevención da contaminación do medio mariño, así como de todas aquelas funcións relativas á seguridade marítima que puidesen corresponderlles, todo iso nos termos establecidos nas normas vixentes.

Para participar no proceso selectivo os aspirantes han de ter o título de Grao en Náutica e Transporte Marítimo, Grao en Enxeñaría Mariña, Grao en Tecnoloxías Mariñas, Grao en Enxeñaría Radioelectrónica Naval ou licenciaturas equivalentes.

O proceso selectivo consta de catro exercicios obrigatorios e eliminatorios, o primeiro exercicio consiste nun cuestionario de preguntas por escrito, tipo test. O segundo exercicio baséase no coñecemento do idioma inglés con proba escrita e proba oral.

O terceiro exercicio consiste no desenvolvemento oral de tres temas e por último o cuarto exercicio consiste na resolución por escrito dun suposto práctico.

Os aspirantes que superen as probas das fases de oposición deberán superar un curso selectivo baseado nun período de formación de carácter teórico para adquirir coñecementos propios do futuro desempeño profesional. Ademais realizarán un período de prácticas consistente en tarefas xenéricas e variadas que teñan como finalidade primordial a adquisición de coñecementos prácticos para o exercicio das funcións propias do Corpo Especial Facultativo de Mariña Civil.